你見過 F1 死氣喉尾段（tailpipe）變咗橙紅色未❓未嘅話，上面條片就睇到嘞。死氣喉變橙紅色嘅原因，係因為呢度嘅「死氣」溫度高達攝氏七〇〇度。WOW。
咁熱點頂呢❓所以，F1 死氣喉要用一種用嚟整噴射引擎零件、叫 Inconel 嘅 nickel-chromium 鎳（粵音：篞nip6）鉻（粵音：各gok3）超合金，然後人手打造。即係手作，極高階嘅手作。
呢種鎳鉻超合金喺高溫之下仍然好很堅固，令 F1「手作死氣喉」可以 keep 住好輕同好薄。根據現任 F1 CTO Pat Symonds 喺二〇一二年二月號《F1 Racing》講，F1 死氣喉頭尾段唔同厚度，總之只係厚千分之二十七至三十五寸：「成個系統只係重大約六公斤」。
F1 死氣喉同街車死氣喉嘅最大相同之處，就係兩者都有頭段、即係「死氣蕉🍌」。V8 年代試過兩排「四一蕉」，V6 年代就係兩排「三出一」。F1 同街車死氣喉嘅最大分別，就係唔駛理法例限制嘅廢氣同嘈音污染。所以，F1 死氣喉無中喉、無催化器（catalytic convertors）、亦無尾喉嘅滅聲鼓（排氣鼓）。
但由於 F1 死氣喉長期處於高溫高壓環境、兼完全係為咗落場表現，所以設計本身就係「短命」。每組死氣喉一般唔會跑多過九〇〇公里。
咁究究究竟 F1 手作死氣喉可以捱到幾熱呢❓其實，係唔止開波講嘅攝氏七〇〇度，應該係接近九〇〇度、即係成千度 C。因為當車手「地板油」、油門全開、引擎高轉數嗰陣，死氣離開盤頂（cylinder head 汽缸蓋）嗰陣就係接近九〇〇度。但一路出死氣喉，死氣溫度就會急跌。
去到尾喉（tailpipe）嗰陣，死氣已經「凍到」得返七〇〇度左右。當車手甩油門、引擎「風門」全閂，F1 排氣系統就會每秒凍大約一四〇度。二〇一二年被禁前，off-throttle exhaust-blown diffuser「風繼續吹 diffuser」仍然大行其道。根據 Pat Symonds 所講，當年死氣出尾喉嘅時速可以去到七二五公里（450mph）。Mental。
時至今日，由於 FIA 國際汽聯限制尾喉位置、用嚟減低死氣對增加下壓（downforce）嘅作用，所以死氣 exit speed 已經唔再係一個 performance factor。
完
第三季《一日一F1》都係 30 篇。如果有興趣重讀前兩季另外 60 篇嘅話，㩒下面個 tag 或者 content search：一日一F1。