揸 F1 車出界有時要罰、有時又唔駛罰，究竟係咩玩法呢❓
踢波或者打籃球出界好簡單，原本控球嘅、就會無咗控球權。出界嗰邊，要讓個波俾對手掟界外球、或者界外開波。出界，就無咗控球權。清晰。
其實，F1 車點為之出界都好清晰。四個轆出曬白界，就叫出界。三個轆出曬界 OK、全部轆擲界都 OK，總之就係所有轆出曬界，先至叫做出界。易明。
F1 車出界嘅複雜性，在於有時要罰、有時又唔駛罰。呢個部份有兩大原因：一）監察機構 FIA 運用科技嘅水平係史前恐龍級落後 二）F1 車出界有時會得益，但更經常係得不償失。
第一點「恐龍級」唔難明。二〇二三年 F1 美國站排位後，由於 FIA 預計比賽期間將會有超多次出界，所以直接將 T9、T12 同 T19 嘅白界「油闊」，以免因科技同人手不足而導致更大嘅唔公平。可笑但可取。同站賽後，FIA 裁判（stewards）直認賽道閉路電視嘅擺位奇差（poorly positioned）、同埋無全面覆蓋出彎位（not fully cover the exit）。點解之前唔知❓定又係不可抗力❓
簡單講，時罰、時唔罰嘅原因之一，就係跟唔曬、睇唔到咁多、無人舉報、就理唔到咁多。
第二點「時得時失」又係咩意思呢❓以二〇二三年嘅 F1 奧地利站為例：FIA 裁判收到超過一二〇〇次舉報話「有人出界」。之但係，全部都係喺 T9 同 T10 快彎出界喎。再推進之前我哋諗吓：假如賽車無界，咁喺奧地利尾呢兩隻彎會發生咩事呢❓
如果賽車無界、就好似喺高速公路無劃快、中、慢線咁，車手一定會直接 cut corners 掟彎、為咗快啲而走捷徑，㨂條最短嘅路嚟行。咁樣出界 cut 彎，就會有不合法得益。因為假如出入彎邊邊既無界、又無壆（kerb）、亦無 gravel 嘅話，車手就可以用更闊嘅 racing line 過彎、提升戰車彎心速度、減少過彎時間、更快過彎。但係大直路射出界呢？慢彎出外檔界呢？就唔止無 so，一般仲會倒蝕，所以出界都唔駛再罰。
F1 車出界罰唔罰嘅大原則就係：出界有著數（如秒數、位置、領先或落後形勢）就罰，出界本身已經係一種懲罰嘅話、就傾向唔再罰。
有趣嘅係，車隊就係知道裁判「真係唔識㗎喇」、真係唔識運用科技協助監察，睇穿 FIA 裁判房人手不足嘅弱點，所以先有奧地利站車隊一共一二〇〇次舉報、「隊爆」個裁判系統，然後美國站到 FIA 裁判出「油闊白界」怪招「還手」、箝制車隊。
咁長遠點算呢❓
待續
第三季《一日一F1》都係 30 篇。如果有興趣重讀前兩季另外 60 篇嘅話，㩒下面個 tag 或者 content search：一日一F1。