日記～25/06/2021～擺門/劃非/蘋果停刋日

星期五  陰天間中有雨 夜晚係倉真係無乜嘢做，十點就熄燈，係石壁仲有街燈照入來，但赤柱嘅設計，係無燈射入來，所以每晚都只好早訓。清晨五點就醒左，咪聽吓收音機，都有好多舊嘅靚歌聽吓，原來有好多舊歌自己係唔識，但係好好聽。七點正式起身，照舊出倉食早飯，雖然陰天，但今日可以出去球場玩，今日係球場同囚友阿翁傾吓計，佢話我之前嘅車衣期B仔阿龍比人鎖左(即入水飯房)，話阿龍收波欖，又話佢初時唔認，比人打左兩權先認晒，真係好似拍電影咁！到底被打係真定假？鎖水記加監就一定會。我劃非係同佢劃，唔知對我嘅蛋撻有冇影響呢？（劃非：牆外親友入一千蚊，牆入收七包煙用作買嘢食）我知佢地係黑社會，係團體工作，並非一個人，所以我相信應該對我冇影響，一定有人送奶茶蛋撻比我（有時大sir 要交人，所以就要人認頭交數，我相信呢個機會大啲，阿龍係車衣期大佬，唔會咁易搞佢，呢啲監房術語叫：擺門）。突然落大雨，即刻要返workshop工作…… 拖地抹車，今日收到係石壁嘅囚友小雄來信（佢去左壁屋），佢話壁屋已經迫爆，十幾個手足係同一個期數，勁多洗衣期，原來壁屋接左醫院嘅order, 最難頂係啲瀨屎瀨尿嘅老人醫院服。蘋果今日正式停刋，訂報紙轉星島啦！放工晚飯捉棋……返到倉原來踢竇（特擊搜倉），見到上次個邦板，佢眼定定咁望住我，唔知佢諗啲乜？無事，係倉寫信。