F1 車手如果因為出界賺咗秒數或位置、賺咗擴大領先或縮小落後形勢，就會被罰。
不過，要罰其實都有唔同罰則。如果練習出界，嗰個圈造出嘅時間就會被 delete，無更重刑罰。如果排位出界呢❓F1 車手跑出嘅時間都係會被 delete，不過呢度要留意喇～ 如果尾彎出界嘅話，咁唔止嗰個圈、就連下個圈嘅時間都會被 delete。如果排位時間被取消，引申意義就可以好大。因為可能直接導致車手過唔到關、排位提早出局，或者起步位被罰向後跌。
咁如果比賽期間出界呢？再複雜少少。F1 比賽期間，每個車手都可以出界三次。三次後，FIA 裁判就會出示「黑白旗」警告嗰個車手：下次再出界，就罰。第四次出界罰加五秒，第五次就罰加十秒。
所以，車手比賽期間「篤灰」篤到對手被罰秒數嘅話，係有直接得益嘅。由於「篤灰」成本等如零，所以有目共睹、大家都好「落力」。結果搞到 FIA 人肉跟唔切，咁點算呢❓
二〇二三尾站阿布達比，FIA 終於測試運用較新科技、嘗試改善裁判水平。根據 FIA 嘅數據話，目前每場 F1 有大約平均八〇〇次舉報出界，如果用咗人工智能等科技之後，就希望可以減少到只係得五〇宗需要「人肉判斷」。
FIA 有三大動作。首先，佢哋將會用一個叫做「Computer Vision」嘅程式。呢個程式利用形狀做分析，而家已經用喺英超（下圖）、NFL、甚至係醫學上掃描癌症篩查數據。目的唔係為咗診斷癌症，而係為咗排除百分之八〇明顯無癌症嘅案例，等訓練有素嘅人員有更多時間去審查最後嗰百分之二〇。
呢個亦係 FIA 嘅目標，唔係去判斷 F1 車手有無出界，而係排除嗰啲明顯喺界內嘅案例，咁裁判就有更多時間去「人肉審查」嗰啲可能出界嘅 cases。因為目前為止，人眼判斷仍然係「十大武器之首」。
第二，將「Computer Vision」夾埋一個叫做「Catapult」（下圖）嘅體育表現分析軟件一齊用。嚟自澳洲墨爾本嘅 Catapult 分析軟件已面世接近兩個十年，一早應用喺英超、西甲、板球同 NFL 等全球接近三〇〇〇支體育隊伍。即使球員攬埋一堆，都可以識別到兼分析到。FIA 就打算畫出自己嘅「lines of interest」，等 AI 喺過程中自己學睇。
最後，二〇二四年 F1 嘅「VAR 房」都會升級，人手將會由四個人變八個人。另外，由世界各地賽車場到瑞士日內瓦「VAR 總部」嘅頻寬亦會增加一倍，等多啲人可以一齊 work from home。
肯追落後，總比內唇環、閉門造車好。
完
第三季《一日一F1》都係 30 篇。如果有興趣重讀前兩季另外 60 篇嘅話，㩒下面個 tag 或者 content search：一日一F1。