咁就十年。隆重介紹今年 F1 新人： Kevin～ Magnussen！呢一年，係標誌性嘅二〇一四年。
老實講，我幾乎唔記得十年前。原來，澳洲揭幕戰就係「新人」麥奴臣嘅第一場 Formula 1。到二〇二四巴林揭幕戰嘅星期日，將會係呢位唔係老鬼、都係老豆嘅第一六四次上陣。
十年前，第一次 F1 起步。K-Mag 有啲 wheelspin、幾乎自炒兼撞人，差少少就圓新人惡夢。好在，救得返。結果，仲有好成績（下圖）。K-Mag 新人第一場就亞軍，相比二〇二三年「F1 新人王」奧斯卡（Oscar Piastri）要到第十七站先上台，簡直就係夢幻。
今年底將會三十二歲嘅 K-Mag 嗰時話：「就算因為歷卡度（Daniel Ricciardo）被罰、我上咗第二，我都有少少失望。因為未係最高嗰級，即係架車同你自己都仲有進步空間。」
結果，麥奴臣嘅新人賽季鬥咗十九場 F1，十二場前十名有分。
講起麥奴臣嘅 rookie season，唔知大家仲記唔記得自己嘅「新人賽季」呢❓
我嘅 rookie season 係喺商台做 PA（program assistant），嗰年我二十一歲。無獨有偶，同 K-Mag 做 F1 新人嗰時同齡。我嘅新人賽季有三個重要嘅人。第一個係女台長 Susan，係佢俾機會我開咪做第一個節目嘅。第二個係同事兼前港大學生會會長 Rosa。第三個係未追到手嘅阿手。
十年前嘅 F1 新人賽季，都有三個人對 K-Mag 特別重要。第一個係世界冠軍隊友 Jenson Button（下圖左）。K-Mag 喺《F1 Racing》二〇一五年一月號講話：「我要多謝隊友畢頓，佢喺第一年幫咗我好多。佢好 open、好 kind、好多時不經意身教我好多嘢，成日點條生路俾我 —— 淨係喺 debrief 聽佢講嘢已經 hugely useful。
「佢係個好車手，亦係個 very good guy。」
第二個係麥奴臣嗰年嘅體能教練 Antti Vierula。Antti（下圖中）最出名係二〇一一同一二年擔任咸美頓（Lewis Hamilton）嘅 trainer。二〇一四年，係 Antti 喺麥拿侖擔任全職 Sports Coach 嘅第四個、亦係最後一個年頭。
K-Mag 嗰時話自己真係當 Antti 係車隊裡面（即係公司入面）嘅朋友，因為同佢一齊幾好玩、大家又成日搞吓笑：「做 gym 嗰陣佢係個 tough guy —— 喺桑拿房入面嘅體能 amazing，佢叫過我做最難嘅嘢就係淨飲伏特加。That's hard」（笑）。二〇二四年前，Antti 係同鄉保達斯（Valtteri Bottas）嘅 trainer、兼同時負責佢嘅商業事務。
最後一個❓我認為就係 K-Mag 爸爸 Jan（下圖左）。K-Mag 話：「嗰年我哋傾咗好多 F1。大家講吓自佢一九九〇年代揸麥拿侖同史釗活（Stewart GP）以嚟，F1 嘅改變同不變。一家人有兩個 pro 車手，可以一齊吹車經真係好正。」
你可能記得，當年 Stewart GP 老闆 Sir Jackie Stewart 曾經話麥奴臣爸爸係「冼拿二世」，點知鬥咗季半、二十四場起步之後就炒咗佢。
前人嘅每段經歷，或多或少、總會幫到有心嘅後來者，走過一個又一個十年。
完
第三季《一日一F1》都係 30 篇。如果有興趣重讀前兩季另外 60 篇嘅話，㩒下面個 tag 或者 content search：一日一F1。