DESCRIPTION
星期六 晴 34°C 一早起身通常未到6:30am，未開燈已經醒左，可能早訓的關係。今日出倉好準時，食完早飯之後，就返去車衣期Workshop，星期六，半天工作，但係流程一樣。平日放風（去球場）時間一樣，11點玩到12點，半小時冲涼，12:30食午餐。今日去球場第一次開網打排球，這是石壁沒有的，已經有兩年半無打過排球了，2019至2021年5月…… 見到排球，眼睛都識發光，可惜我牌仔係3U（1A係最年青力壯，而3U最老弱傷殘，不能玩波）。自己只好在場邊搓吓波，見到佢地打波真係好危險，又觸網，脚又過界隨時抝柴。 我在旁做吓球証，幫大家計吓分，始終自己係新人，要同大家打好關係，要等除了3U 牌先可以落場打波。打完波就去冲涼，冲完涼就返去workshop 玩，唔使做嘢，等收工。我就攞本數讀出來玩吓，如果係石壁係可以玩結他，但係赤柱，結他被鎖住，要假期先可以攞出來玩。 監獄就係咁，生活非常規律，飯餐一星期循環一次，每日食飯打波都有時間規定，幾點冲涼，幾時放風，逢星期日都有電影播放比你睇，有時西片，有時港產片。又到晚飯時間，就由workshop 去到飯堂，飯堂有冲涼房，食飽可以再冲一次涼。冲完同新囚友捉吓棋，係監獄就係咁養懶人，明日星期日，全日休息，可以攞結他玩！PS: 啲排球就係呢種膠波，又舊又殘！