DESCRIPTION
星期一 26°C
六月，夏天到，今日天氣總算涼返小小啦！雖然涼左，但昨晚都醒了很多次，不停聽收音機的通宵節目，聽了很多舊歌同新歌。6:30起身，今日係星期一，放完假今日要開工啦！越南仔今日終於很開聲，仲識講廣東話，原來傳聞話佢地好古惑都係真，而且傳聞話佢地好喜歡偷嘢……！出倉食早飯，我同囚友威威已經決定唔會再理另一位囚友阿聰，當然係發生了某些事情，監獄真係一個比女人更八卦的地方。早前做錯嘅嘢，今日要補飛，因為11點要去球場，須要在出球場前做好佢。去到球場，自己一個人攞住個排球玩吓，完左就去冲涼再去飯堂，係飯堂，突然見到區諾軒來左我個期數，因為整個期數只有我地都係政治犯，所以好自然大家會坐在同一枱食飯。因為區諾軒早前係單獨囚禁，現在落來大棚，相信是單獨囚禁並不好受，孤獨寂寞。食飯傾左一陣，返到workshop 又傾吓，到晚飯再講吓呢個期數的規則同人物關係。我早前在石壁已經入過水飯房，區問起水飯房的事，點知囚友阿聰又來搭訕，又講錯晒啲嘢！唉！自己係新人又要扮嘢，世界總有呢啲人。今晚又有蛋撻食，攞完奶入倉就見到包得好好的蛋撻在床下底（大家有訂報紙，通常用膠袋包好，再用報紙掩飾）。咁又一日，早前報了一個“食物衛生經理”課程，明天要上堂了，無須返workshop....