DESCRIPTION
星期四 上午有雨/下午密雲
昨晚三點醒左一次，之後就聽住收音機再訓，七點正起身。今天正式去洗衣期，坐監就係咁，無得反抗，我今次已經好大胆，同職員爭取原級調倉，唔使由尾做起，已經好好，糧單照舊五佰幾一個月，如果由尾開始，每月得二佰幾。
去到洗衣工場，有個 locker 比我用，第一日去到就話漏煤氣，大家全日係飯堂，我就要去上堂“食物安全經理”，今日係第二堂，明日就要考試了。上午老師遲左小小先上堂，赤柱喎，唔近架！學嘅嘢好簡單，香港係邊個國家殖民地？竟然有人答法國，真係死未？
攞反個“食物安全經理”牌，都算有啲嘢攞返出去，唔好浪費時間。如果可以讀書，我都想讀，不過福利官話通常啲位都比個啲超過十年刑期嘅犯，因為申請大學課程，審批都要幾個月，我得十個月唔好諗讀啲乜乜啦！而且係監獄真係可以好專心咁讀書，乜娛樂都冇，又冇女溝，冇得煲劇唱K，的確係讀書好地方。
上完半日堂，返飯堂食飯，原來每個期數都有自己獨立飯堂，食完再上堂，每次都有職員帶住。上完堂就返飯堂食飯，安排我同一位叫城叔嘅囚友同枱，有其他囚友提我，城叔係一個老千，叫我小心啲，好在我一直都唔賭錢，係監獄遇過毒犯、殺人犯（石棺案）、製毒師、做假數犯等等，老千係第一次見！飯後返倉温書。