DESCRIPTION
照舊6:30廣播前起左身，今日係考試日，早上有小小時間温吓書，出倉早飯都係如常！第一次入洗衣工場，真係比石壁大好多，起碼大四至五倍，好快就上堂了。見到啲洗衣機/亁衣機高過一個人，大約有兩米高，成個人可以捐入去，可以入到四、五人。最新奇係有部全球第一部乾衣機嘅古懂，成個金色好有趣。
職員帶我去上堂，去到電腦房已經人齊就開始上堂了。今日收到係石壁識嘅小雄手足，佢過左界去壁屋同華叔一齊，佢話識赤柱醫院B仔囚友，叫阿成，叫我有機會叫我問候佢，咁岩，有兩個醫院期同我一齊上堂，我就順便問吓佢地識唔識阿成，世界真係細，其中一個就係叫阿成，上天嘅安排真係好奇妙。
老師幫我地温習一次，中英對照，因為有一位同學係ON （外國人）。上午完左，返工場食粥同面包（午餐），同新囚友吹吓水，之後就返去考試，全部係MC, 十分容易，即時宣布合格，等証書會寄去屋企，因為到時我已經放左學。明天要正式去洗衣工場開工，工場都唔係想像中咁熱，可以接受。今日收到新歌譜，整理一吓，星期日可以唱新歌仔。