DESCRIPTION
星期五 晴，傍晚下雨，一號風球
早上起身，望向對面倉，因為區諾軒住正對面，另外仲有一位囚友叫阿聰，今朝只見到阿聰係倉，唔見區諾軒。
出倉食早飯，之後就出去球場放風，呢個時段做運動比較好，太陽仲係初升唔太晒，睇吓明日可否玩排球。今日都係寫吓信，完左就返到workshop 正式開始新的工作（洗衣期）。赤柱真係好大，一個期數擁有一個飯堂，workshop 並非想像中咁熱。原來擁有結他譜都係識朋友的橋樑，有新囚友見到我啲結他譜主動過來識我同主動同我傾計（係一個物資缺乏的地方，任何物資都係爭奪的目標）。
因為我帶住升左職嘅位置轉期數（因為轉期數要由最低做起，係自己爭取原本位置轉期數），所以初到尚未有什麼工作分配比我。食完午餐，下午就幫吓手摺吓衫。有個囚友成日問我知唔知區諾軒做議員時規劃啲地嘅計劃，因為早啲知道成市規劃，就可以早啲係個區買樓等收購而賺一筆錢，黑社會入獄都係為錢，為錢可殺人，為錢可犯毒害人，為錢走私，為錢迫人做雞等等……晚飯後，又同個位老千捉棋，我能夠連贏兩局，老千手法都係咁，我唔會賭錢！
職員通知，有人一次寄了三佰張歌譜比我，職員話太多不能比我，會等下次探訪退回，我都估應該係條傻佬“豪哥”。