DESCRIPTION
星期六 兩天 昨晚好大雨，高高的窗口漏水入來，一早起地下濕晒，好在早起，把地上積水清理好。一早尚未去食早飯，職員開了門，越南仔就來求救，因為佢上庭無帶齊物品，一判罪成即由荔枝角去到赤柱，所以佢所有物品依然在荔枝角，我又邊有能力幫佢，我都愛莫能助，只有等一陣同老闆（職員正樁）講，睇吓幫唔幫到佢。出倉了，食早飯，因為落大雨，無得出球場，只有返到工場，但都無乜嘢做。開始學吓點樣摺衫，點樣分人名同分期數。全日都係工場，好在有locker 可以放低啲物品，有時間就只好寫吓信。“石牆花”啲筆友開始寄共同信（即係一封信影印好多封，寄比唔同的手足），因為今日回信時，有手足望到我筆友封信，原來我地有共同筆友，所以都收到同一封信，都明白要寫咁多信係要用好多時間！其實同筆友通信，大家建立了一段友誼，同囚友也一樣，大家一齊工作、食飯、冲涼，一定建立左多多小小的友情！因為歌譜的原因，好多囚友都問我借，因為多謝友人及家人將最新歌譜寄入來。晚上食飯時有睇電話，612兩週年，有人出去集會，有多人被票控限聚令，有兩位堵路被便衣捉到，無奈，心痛！自已感冒嚴重左，區諾軒攞到單人房，係正我對面