DESCRIPTION
昨晚好早就訓左，因為有小小感冒，有咳同頭痛，所以在晚藥時食左四寶。（當返正倉之後，大約八點左右，職員會攞住藥箱，巡邏每個監倉大聲叫“夜藥”，囚友可以走近閘邊同職員講要什麼藥，四寶係四款不同醫感冒的藥），所以食完藥就去訓。今朝起身好像好轉了一點點。
清晨五點幾醒了，聽吓收音機，係到賴床，六點半先正式起身。收音機聽到好多新人，洪嘉豪、張天賦、姜濤、陳卓賢、Anson Lo、Eden 等等，好多新人出歌！（係2021年係新人，現在2025年佢地都係好紅嘅歌手）。
出倉/早飯/球場/工場，如常工作，返到洗衣期，開始同囚友熟稔了多一點，還未分配我位置，只係到褶吓衫先，因為我原本工資轉期數，所以應該會做其他工作，等職員安排。（轉期數時的條件，原來係監獄都有權去講條件，只要自己夠胆開聲爭取）。
職員有問我，做唔做燙衫，我覺得燙衫會好熱，所以我拒絕唔做，都總叫做幾專重我的意願，可能見我年紀老啦，比啲年青人做燙衫位。派藥每日三次，早飯，午餐同夜藥，每次都要四寶，每次食藥要係職員面前吞左，再張開口檢查，食完藥真係會好眼訓。
今晚加餸，食炸魚柳（加餸，係指枱底交易，十非煙比厨房加一碟非官方指定嘅餸，監獄默許枱底交易）。
監獄內嘅囚犯，真係千奇百怪，什麼人都有，有啲又無料又八卦，有騙子又有殺人犯，都係自己顧自己，返倉早啲訓，日日都頭痛！！