DESCRIPTION
星期一 29°C 晴天今日係端午節公眾假期，在囚平日還有工作，但放假冇乜嘢好做，要困係飯堂一整日，來來去去都係唱歌玩結他、捉棋、睇電視、睇書、打康樂棋……係咁多，所以如果讀書，真係有好多時間去温書，所以假期都會比較悶。
每個期數都有不同放風時間，而轉左來洗衣期，就變左一食完早飯即刻去球場，再返workshop 冲涼及開工，係workshop 冲涼就係有水喉嘅地方，大家一齊冲，整個workshop 嘅人都見到，監獄就係咁，包括冲涼房都無遮無掩，大家為了方便開工，都唔去冲涼房而選擇係workshop 冲，包括我自己。假期都係一樣，出到球場，無人打排球，只有自己行幾個圈便算。赤柱比較好，排球場、藍球場、足球場集合一齊隨自己選擇，而石壁就只有藍球場同足球場而已！赤柱分開A河同B河兩邊，大家唔會過去另一邊，我係係A河這邊。
可能昨日星期日，已經玩左一日結他，今日大家唱歌玩結他的意慾不大，有時太多人反而玩唔到，結他須要時間練習。今日都係捉吓棋，其實日日都有捉啦！想唔進步都難。
赤柱係黑手監獄（坐過一次監的人），而石壁係白手監獄（第一次坐監的人），赤柱啲犯係有好多大佬係到，唔同石壁，新犯監獄，所以好多懲教職員都夠胆係石壁玩犯，而赤柱啲職員就唔會咁做，應該怕放工時比人伏。今日好平淡就過了一日假期，晚餐後返倉而倉氣温好熱，等大堂冷風機運作一段時間，氣溫才會有好轉，通常要到晚上十點左右！因為對面的牛角大風扇會把冷風吹入倉內。 PS:到底邊邊係A，邊邊係B, 我已經唔清楚，這圖只係一個假設，我從來未去過B河那邊！