DESCRIPTION
炎熱 晴天 星期三
有感冒，頭痛，昨晚早訓。唔係冷感冒而係熱感冒，因倉入面太焗！
清早六點就醒左，聽吓收音機啦！都係如常出倉、食早飯、運動、工作…… 暫時仲係褶吓衫。開始有好多囚友主動同我傾計，返左幾日，都開始去識啲新朋友。呢個世界，一樣米養百樣人，監獄就係千奇百怪聚集嘅地方。有好多人都話放監後會返大陸住，有人話生活費平，有人話啲地方好靚，有位製毒師仲話返大陸製毒！我只好奇回答，係咪要好多錢去疏通？大陸好？我就回答，會唔會買到毒奶粉？假酒？假雞蛋？互聯網又上唔到，新聞又係造假新聞，生仔都要限住你，假乜假物……等等。如果真係咁好，啲人應該會留係大陸，點解大陸嘅有錢人要移民去其他國家？結果大家啞口無言地散開。
食完下午粥及面包後，突然老闆揾我。老闆同我講，因為我係車衣係DA位，而洗衣嘅DA位要燙衫，但又因為我孭住“黃簿”所以不能操作機械，所以要求我再返去見心理組返小欖甩簿，我答應燙衫比返個DA位我。
食左藥好眼訓，好攰，食完晚飯，返到倉8點就訓啦！
DA 位：懲教署工資計算方法。証明在囚人仕應該要開聲爭取自身利益。
黃簿：一本由精神科發出，每日要由職員簽名証明，係情緒問題嘅犯人須要。因為早前不滿石壁啲懲教，所以同佢哋玩嘢，自己申請去小欖，一返到石壁即刻過界去赤柱，當時石壁嘅保安話因為石壁細，孭“黃簿”冇乜工種岩我，赤柱會多好多工種。
當時石壁犯人：三佰幾
當時赤柱犯人：一千五佰幾