DESCRIPTION
星期五 密雲間中有雨 昨晚都係好早就訓，大約八點左右就上床訓，因為食左四寳感冒藥，訓得好霖。早上7:00先起身，雖然6:45有morning call... 洗面擦牙再執吓嘢，出倉食早飯球場workshop 一切如常，監獄就係咁，日日如是，非常沉悶。今日收到一叠信，通常都係球場時派信；之後冲涼再返worshop 工作，今日好眼訓，hea 住做，忽然有職員叫我去醫院，咩事呢？只有跟住去，原來要同醫生講要甩簿嘅事（黃簿：情緒有問題）。點知醫院職員話冇我個名，叫我返去，在返去workshop 途中，見返剛才call 我去醫生個位職員，於是同佢講我冇見到醫生，點知佢話一定要見，話會安排，又調頭返去醫院，今次見到醫生了，同醫生講要甩簿嘅事，於是安排返worksop。返到workshop 老闆話星期一會安排上位，即係唔使摺衫，咁到底會做乜呢？食完午餐（一片面包及一碗粥）後，下午開工，照舊摺吓衫，下午就有職員同我換左牌仔（監獄身份証，寫明你係邊個期數，犯什麼事，幾時放學等等），是否真正甩簿呢？返到倉，見到倉門口的資料牌都改了，因為情緒問題會寫明 M.O.List.... 感冒有小小好轉，不再頭痛，但身體依然好攰，夜藥照舊四寳，早啲訓！