DESCRIPTION
29°C 密雲有雨
昨晚都係好早就訓，好像習慣了，都係一邊聽住收音機，一邊訓教；昨晚聽左好多舊歌，放學出返去，啲歌譜唔知仲有冇時間去搞佢？
今朝6:20就醒左，每朝6:45都有廣播morning all .... 每日重覆的生活方程式，照常出倉，照舊食早飯，如常出球場，同樣時間去冲涼，返到workshop重覆的工作，我已經幾好運，調來調去，我只係十個月都悶到嘔，十年以上個啲真係好難撐住，所以真係有必要去見心理組，間中去吓小欖放吓假都係一件好事。
每日都係平平淡淡咁過，今日星期六，明日又係放假唱歌玩結他的日子。今日食完包妹，突然有隻老鼠出現，係監獄咁悶嘅地方，有隻老鼠走出來，點會有人放過佢，成四五十個大男人，一齊圍毆一隻老鼠，點會比佢走甩，而且又冇地方可以躲藏，一人一脚當佢波咁踢，必死無疑，我都無眼睇！
今日睇報紙見到“蘋果”高層被告“國安法”，真係不知所謂，有強權無公理，香港法治已死！當我放學後，社會到底會變成點？
今日無乜工作，大家都係到議論個五千蚊電子消費卷，到底囚犯點樣可以領取？點樣用？係咪會當出糧咁，係監獄內買嘢？坐緊監又無八達通，又點樣用？大家都係到熱烈討論。
我已經甩簿，到底比個咩位我做？星期一就要做一個新位置。明日妹妹加好友探訪，期待！