DESCRIPTION
29°C 驟雨
今日星期日，大衛Day 唔使做休息日，其實日日都係休息，都無什麼感覺！都係照舊六點幾起身，七點半出倉，八點食早飯，九點半出球場，十點半沖涼。今日返到飯堂已經有人攞左結他，當然唔該晒佢地幫我攞埋個結他（B 仔係有特權）。
妹妹今日會來探訪，正好同佢講消費券怎樣幫我領取。無嘢做其實真係好無聊，捉吓棋，玩吓結他，但係佢地就好開心，因為有人賭馬，有人收外圍，佢地會係到聽收音機跑馬，成日聽到佢地輸幾千蚊，又要家人探訪時找數。
剛食完包妹就剛好探訪，今日好友健威都來左，還有李俊威議員，今日真係開心，兩位大人物都一齊來！健威就比較攰，而李俊威議員下個月應該會被DQ, 呢個香港只會越來越謊謬，做議員會被DQ，這是什麼世界？真的担心議員。大家都話我肥左，老實說，唔肥就怪，食飽就訓，又冇乜壓力，唔使諗租金唔使諗人工，唔使諗使費…… 佢地今日入左好多物資，我也開始劃非（家人在外入錢到B仔戶口，我就係入面收煙，1000蚊有八件煙），可以買嘢食，例如可以食蛋撻同飲奶茶等等。
探訪完，回到飯堂，發現結他被囚友攞左去玩，無所謂啦！總之唔整爛就得，因為係監獄，壞左嘢會好煩，又要申請，又要等家人買，又要等阿sir 批，真係要等個幾兩個月先有新。唱左兩首歌又要收結他。
食完晚飯，返到倉，寫吓日記，又一日。