DESCRIPTION
近期香港最明顯嘅一種狀態，係政權對任何有機會成為「組織者」嘅一員去進行清洗。
從香港政權瓦解泛民政黨、公民團體同學生會之後，曾經有一段時間，社會表面上好似進入咗一種連法庭內就算處理緊政治審判都沒有一絲波瀾嘅「平靜」。除咗偶爾針對一啲零碎、被標籤成「極端」嘅言論採取行動之外，政權似乎已經唔再需要大規模出手。
但自從宏福苑人禍之後，我哋再次清楚見到，政權真正恐懼嘅，從來唔只係一句說話，而係人與人之間重新出現連結。
唔一定係最出名嗰批人。好多時，真正被針對嘅，係嗰啲默默連結大家、籌備活動、維繫社群、令人與人之間保持信任嘅人。因為政權知道，只要有人仍然可以互相認識、互相幫助、互相討論，社會就未完全被孤立。
只要成為組織者，政權就會用盡一切方法去撲滅。
少咗行動派中間連結嘅橋樑，公眾就只能停留喺網上平台嘅連結。但網上世界，其實係最容易被操控嘅地方。資訊可以被扭曲，情緒可以被帶風向，群眾亦都好容易被演算法推向犬儒、冷漠同互相猜疑。
一個失去在地連結嘅社會，人會慢慢習慣沉默。大家明明活喺同一個城市，但彼此之間再冇真正接觸，只剩低帳號與帳號之間嘅互動。
所以而家更加重要嘅，可能唔係不停refresh資訊，而係重新建立人與人之間真實嘅連結。
約朋友食餐飯
見下面
傾吓近況
互相關心
圍一圍爐
因為在地連結，正正係現時我哋最需要，亦都係個政權最用力去阻止嘅事。