DESCRIPTION
星期一 晴/間中驟雨
清晨五點就醒左啦！一路聽收音機到七點先起身，其實真係會養懶人！
出倉，食早飯，出操場，每日如是，今日係操場拉吓筋跑兩圈便算。返到Workshop 就同大家一齊冲涼，冲完就係到等工作，因為要等衣服送來才可以清洗，在等候期間，老闆馬爺（職員）同大家玩遊戲，（心諗，職員其實都係陪大家你到悶，反正大家無嘢做，不如一齊開開心心又一日）。
下午職員轉更後，職員同我講，明天有新工作分配給我，因為人工係高，所以工作也不一樣，係監獄，階級觀念好重，每一個職位做唔同工作，就有不同人工，人工職位等級分好多，所以B仔（囚犯的管工）要睇住大家。原本係叫D.A.位（ D grad Assistant)，好快升做D.S.位（ D grad Senior).... 我來到赤柱真係比較幸運。係監獄囚犯中，最低賤就係性罪犯，除了冲涼時經常比人打，我見過被人輪住雞姦，我見過要人跪低張開口屙尿落去。除了肉體外，食飯嘅肉會被人攞走，糧會被其他有勢力囚犯扣起等等，有時職員見到當見唔到，因為強姦犯係無人可憐！
今日職員繼續講解5000消費券如何領取，原來可以用百達通由家人代為網上登記，都好，攞左先，到時買乜都好啦！昨日阿妹又幫我劃左1000非（入一千比B仔，我係入面收七包煙買嘢食）。
監獄內真係好多奇人異士，晚飯後跟一位老人家捉棋，原來他是一位老千，手法熟練，捉捉吓可以唔見左啲棋，哈哈，好在沒有捉任何嘢，消磨時間，大開眼界，係出面邊有機會見識到呢？