DESCRIPTION
星期二 雨
昨晚好大雨，被雨水打落窗口再被雨水彈落面上，被雨水彈醒了，因為氣窗太高，我企上櫈申埋手都點唔到個窗，只好調轉訓，尤得雨水彈落對脚到啦！
訓到七點左右起身，簡單洗吓面擦牙就出倉，早飯前同囚友阿龍講，已經劃左非（即銀行過左數）過左一千蚊比阿派（B仔阿頭）（劃非即係過一千蚊就有八包煙比我，可以買嘢食加餸，唔知幾時收到呢？早飯後直接返去Workshop , 因為落大雨無得出球場。
係Workshop hea …… 因為尚未安排到我新工作，老闆見我游吓游吓，於是問B仔，結果要下午才安排到工作比我，所以自由幫吓手便算！
下午終於有新工作，就係清潔好啲運衣車，運衫車太約1.5米 x 2米 x 1米高嘅車仔，黃色而且係膠（圖片係橙色，赤柱用的係黃色，外形一樣）！每次運完污糟衫就要清潔，因為洗完之後嘅干淨衫都係用呢啲車運去比囚友摺衫。
到放工食晚飯時，見到石壁的囚友過來的華哥，傾左兩句，佢話石壁探訪好困難，我話係，因為好難攞禁區紙，佢又話好易攞，咁即係點呢？自打咀巴，監獄就係咁，畸零人多的是！